有幸福掌聲同笑容接棒 同主好馬功成身退！

馬主黃凱汶近年養馬運奇佳，剛剛就有「幸福掌聲」290倍差一步贏到打吡，而同場跑季軍的「幸福笑容」，至今亦累積四捷獎金逾千萬，可能係見兩隻後生馬接到棒，黃凱汶較年長的「幸福分享」今日入紙退役了。呢匹六歲馬在港取下3W，亦都試過出戰打吡，敗於「平海福星」之後得第6名，最高成就係大前仗攻下谷草三級賽一月盃，不過近期「幸福分享」開始缺課，可能健康狀況有異，最終馬主都係讓佢退下前線，希望呢匹好馬以後有好生活吧。另外威哥另一匹五戰全敗的英國自購馬「寶都」，剛於本月頭未能通過獸醫檢驗，及驗出右前腿不良於行，結果要除名；尚有老霍一捷馬「得其康」，也於今日退役。

轉倉馬方面，高伯新剛剛跑第三的「金剛石」，是日轉投鄭俊偉馬房，米高現時得11W，尚欠5場才達馬會要求安全線，今日得此有近績後生馬加盟，當然係搶分主力，各位短期內睇實佢。