東網電視
更多新聞短片
「嫡愛心」(H93)由麥道朗代課試閘動態積極，為今戰補中做足工夫。
1/2
雖然呢個聖誕當期，有唔少4歲馬列陣，積極搶分跑經典賽事系列，由於首關香港經典一哩賽，將會响2月4日舉行，仲有兩個禮拜時間，就會公布入選名單，所以啲分數低馬匹，都會密密跑爭取成績，攞到最後入場券。
不過對於今晚尾場出戰「嫡愛心」嚟講，就一啲無擔心，因為本身96分，係目前現役4歲馬第二最高評分，僅次於99分嘅「四季醒」，所以佢就一定有份跑，而神仙除咗近績出色嘅「安騁」之外，據知呢匹「嫡愛心」，都會係神仙進軍今季4歲馬經典系列重要棋子，最終夠唔夠打吡2000米氣量，不過首關出戰1600米香港經典一哩賽，就肯定合腳法。
雖然出賽至今都係跑1200米，只曾响上季尾跑過一次1400米得第4，不過艾道拿認為馬匹天份極高，對於適任一哩並無阻力，上場復出雖然只跑第3，艾道拿就解釋高頭大馬比起同場對手，由於初出少咗熱身，能夠上名亦證明本身能力。
艾道拿亦不諱言因為跑得少，「嫡愛心」今場仲可以憑新鮮感跑短，但係下一場就會同神仙密斟，起碼都要增程跑番1400米，藉此仄試吓馬匹真正實力。
自從放完假之後，艾道拿上周五夜賽起，復出跑咗2個回合，只係响元旦日賽事跑過兩個季軍，比起季初變身嘅如虹氣勢，依家已經跌出騎師榜前十名，當事人就好有信心，將會盡快回復最佳表現。雖然今晚只得4駒上陣，當中以「嫡愛心」抽排1檔出擊，為今季邁向4歲馬經典系列而努力，呢鋪尾胡，睇嚟艾道拿都好有信心可以食得出。
艾道拿與蔡約翰合作愉快。
