東網電視
更多新聞短片
麥道朗計劃月底返回祖家新西蘭出戰大賽日。
麥道朗响元旦日跑完告別戰，轉眼依家已經身在悉尼，而佢亦決定咗，明日就會恢復披甲，响肯德百里8場賽事，卜咗跑7場，而老拍檔華禮納亦都急不及待，安排4匹馬由佢出戰。
據麥道朗透露，由於澳洲方面2月開始又有連場重要分級賽，所以呢段時間，好多馬匹都希望稍作熱身，以最佳狀態迎戰，華禮納用人之際，老麥當然要配合，而呢兩日嘅賽事，佢都已經卜定晒，除咗明日肯德百里黃昏賽復出，星期六就會移師蘭域馬場跑6場。
呢個月底，麥道朗仲透露將會返回祖家新西蘭客串一日，1月27日愛莎妮馬場卡拉卡百萬錦標賽馬日客串，佢已經接獲聘約，响總獎金150萬新西蘭元嘅卡拉卡百萬3歲馬錦標，佢會為練馬師詹姆士及韋宏德名下Orchestral操刀，另一場總獎金100萬新西蘭元嘅卡拉卡百萬2歲馬錦標，練馬師馬晏殊亦已卜定佢騎Velocious出戰。
麥道朗表示，已相隔3年未有返新西蘭出賽，所以佢都好期待今次可以响祖家上陣嘅機會，屆時貴為維省冠軍騎師嘅薛恩，亦會响呢日賽事同場競技。不過响呢個賽事之前，下個周末麥道朗亦要飛去昆士蘭一趟，將會出戰黃金海岸神奇百萬賽馬日。
