今早曾拋下助手 馬林弗到漏油

今年農曆新年賽馬日，韋達派7駒參戰，當中不乏有近績支持之輩，絕對有力打響龍年頭炮，甚至有連場數胡之力。經過昨天大年初一晨課例休，今早韋廐所有參戰馬全線於內圈復課，先後交由助手踱步，隻隻起步都火噴噴，狀態均討好，各鞍上人需小心翼翼出試，其中出戰尾場愈1300磅的「馬林」直情好似條巨龍咁生猛，操至城門河附近時更一度拋下助手劉泓，猶幸只係走甩數十米即被捉回，總算冇走火，同時未有賽程的廐侶「撼天鐵翼」也受驚嚇拋下助手，救護車一度出動戒備，可幸最終人馬皆無恙。

值得一提，今早一度走甩的「馬林」上場重遊勝門，賽後韋達已開定期票，明言此駒季內連番受外檔才影響發揮，只要有好檔位幫助，三班仍有餐士，而今戰「馬林」於三班首本田草1400米抽5檔起步，練者開口中，且看班德禮能否再做多齣好戲吧！