東網電視
更多新聞短片
曾經有前輩講過，一眾精英分子都會將目標放在打吡大賽，前兩關香港經典一哩賽及香港經典盃都只熱熱身試探性質，唔會催谷盡全力出擊。講真，以前聽到會覺得多餘，話晒都係大賽，又點會唔肉緊？不過睇番上賽「超超比」嘅發揮，又覺得唔係冇道理。
第7場4歲馬2000米，香港打吡大賽，沈集成馬房「超超比」上仗香港經典盃排11檔起步，馬匹出閘反應快，鞍上人周俊樂即時作出催策，明顯想佔取前列位置，不過騎咗幾步之後發覺未能順利切入，即時收慢馬匹，不過一拖就將馬匹拖到落包尾位置，慢步速賽事處於極不利處境，可以話同放棄取勝冇分別，最終是場頭馬「驕陽明駒」末段造22秒93掄元，而「超超比」入直路遲遲先至能夠望空，只衝最後200米末段都造22秒97跑第7，初跑田草表現其實唔簡單。
「超超比」復課後一直有積極打磨，埋門連續3課拍「喜蓮勇感」都不落下風，狀態弗得交關，今場戲肉香港打吡大賽，當然唔會再手軟。
■陳志懷
