東網電視
更多新聞短片

1/2
筆者本周三啟程前往日本名古屋採訪「維港智能」參戰高松宮紀念賽,先在本欄希望「維港智能」取得好成績,揚威海外。雖然筆者今次非首次海外工作,但第一次到日本採訪,得到唔同人幫助,感謝各位幫忙。
短短幾日跟實「維港智能」,深深感受到帶一匹馬出海外遠征唔係一件易事。今次決定遠征,沈集成當然有部署,因為以練者觀察以及其領班匯報,都認為「維港智能」1200米為正宗路程,所以好快已決定唔跑女皇銀禧紀念盃。據悉是次決定遠征,練者都有聆聽馬房員工建議。而高松宮紀念賽撞正打吡,練者分身不暇,佢全權交予領班負責,可見佢十分信任馬房員工。
馬主朱潤流周六抵達中京競馬場睇實愛駒操練,而名古屋持續落雨,朱生冒雨接馬跟實返馬房,其後都表示信晒騎練,幕後建立好互信,正正係爭取佳績嘅要素。而梁家俊昨日在中京競馬場都有一匹外線坐騎,朱生亦入場支持,結果此駒跑第9名。
最強對手濠城
講番高松宮紀念賽,「維港智能」話雖作客,但由於抽得10檔起步,梁家俊屆時可因應形勢選擇跑線,相信跑法添彈性,加上持續有雨,此駒曾在沙田黏地有證明,相信呢邊場地冇咁乾快就仲好跑,相信今次「濠城」係主要最強對手,此駒9戰1200米取4冠2季佳績,加上跑法機動,加強配搭用李慕華,力爭3連勝亦不容忽視。
