東網電視
更多新聞短片
盧頌之加入「八模兵團」而入行，開始廣為人所熟悉。
1/7
由組合變成單飛的模特兒盧頌之，出道以來曾有不少演出機會，但為了愛情卻一一錯失。如今重新出發的她希望向外界證明自己對演戲的熱誠，為應付將來的角色需要，更積極裝備自己，誓言要撇除「0靚模」之名！
昔日戀愛至上
模特兒盧頌之（DaDa Lo）由舊八模開始闖出名堂，其後挾「翻版阿嬌」之名與拍檔裴殷（A.Lin）推出寫真集，再隻身由模界轉戰影圈。出道短短四年，她亦自認所經歷的似乎比別人多：「入行幾年就好似經歷咗人哋十年先經歷到嘅嘢，由起初一班女仔柴娃娃好開心，之後得番同A.Lin 兩個人，再到依家得自己一個。開頭一定有啲唔習慣，始終有個人陪咗你咁耐，同埋大家相處咁耐有咗默契，面對一啲唔識答嘅問題都會有人幫你拆。」
除了事業發展有所轉變外，DaDa Lo 四年來亦成長不少。19 歲出道的她自言以前戀愛大過天，曾經為愛情放棄事業：「我對上一個男友唔係好鍾意我做呢行，當時會覺得：『好啦！你唔鍾意咁我就唔做，反正都打算結婚。』所以嗰時有人叫我拍戲都推咗唔做。試過出晒Poster 話我會去行騷，都突然唔出現。當你一次推、兩次推嘅時候，人哋就唔會再搵你。」
不再任性
那些年錯過的機會，令DaDa Lo開始學懂珍惜，任性不再的她更揚言會努力把握以後的每個機會：「以前推Job 時會諗：『Job之嘛！』依家先知道呢啲機會好難先有，但嗰時唔識珍惜，依家惟有重新開始，建立番信心畀人哋！其實諗番唔多唔少都有啲後悔， 但又覺得如果當初冇經歷過呢啲嘢，我仍然會係個好任性嘅人，唔會識得珍惜，唔會識得去多謝嗰啲肯畀機會我嘅人。」
錯誤中成長
為證明已從錯誤中成長，DaDa Lo 趁空檔積極裝備自己，更放下身段透過體驗不同職業的生活方式，去豐富人生經驗及揣摩角色：「我覺得一個成功演員裏面應該要有好多嘢，有人會好有演戲天分，但我冇就惟有靠累積經驗，例如幫人做吓形象設計，先會知要兼顧好多嘢，當你真係做過嗰件事，就會知後面花過嘅工夫。即使將來有人搵我拍戲演形象設計師，點樣可以做到入型入格，演繹到深入啲嘅嘢而唔係得個殼，就要由生活細節入手。趁未有電影工作時，我會去試唔同崗位累積經驗當係學嘢，例如之前跟過電影嘅服裝設計、依家幫King（男友趙勁皓）打理健身房，得閒又幫吓朋友做Sales 咁。」
不再0靚模
出道以來一直被冠以「0靚模」之名的DaDa Lo，與時下為上位又奇招盡出的0靚模雖有分別， 但外間難免會將兩者相提並論。其實她對「0靚模」身份並不抗拒，但希望終有一日能夠正式成為「演員」：「可能啲人界定唔到你係邊個Category（類別），就將你撥埋落去， 但我希望有一日喺報紙個名唔係叫『0靚模』，而係『演員』或者『藝 人』。」
「King教我靠自己」
以往愛情第一的DaDa Lo自與模特兒男友King 拍拖後，心態亦變得成熟，更驚覺女人要多靠自己：「同King一齊之後， 先醒覺原來要靠自己多啲， 但我之前係冇呢個Concept。King係一個事業心好重嘅人，佢會教我要多啲靠自己，唔可以成日靠人哋，就算結咗婚都應該要有自己嘅事業。以前失去太多機會，所以依家事業同愛情會平衡番。」與King 甜到漏的她不諱言希望以情侶檔姿態出騷搵真銀：「之前曾經有人搵過我哋一齊出活動，最終因為夾唔到時間而冇成事，當然會想多啲情侶檔出騷啦！可以搵多啲錢嘛！」
後記：唔剪唔知時運高
出道以來一直以長髮示人的DaDa Lo，今年毅然剪短頭髮，原來只因一時衝動，卻意外獲得更多工作機會，她說：「當初剪髮係為新鮮感，剪完後身邊朋友嘅評語各有不同，但係就Cast 中咗部獨立電影，又中埋廣告等。」工作機會多了，但她笑言較愛長髮造型，更驚覺原來自己「都幾靚女」！其實DaDa Lo性格爽朗又「男仔頭」，短頭髮令形象變得鮮明，加上剪髮後工作機會不斷，似乎更有利她的個人事業，她大可考慮Keep住「男仔頭」呢！
盧頌之「消失」一輪後重新工作，夥周秀娜等拍電影。
盧頌之與趙勁皓相處十分開心。
八模散Band後，盧頌之改與A.Lin拍住上出寫真，當時演出機會處處。
為拍拖推Job 一段日子，盧頌之坦言錯過了不少機會，但已恨錯難返。
盧頌之與男友趙勁皓拍拖後，從對方身上學到不少人生哲理。
改了一頭短髮的盧頌之（左）重建星途，還成功Casting再拍戲。
