《羅生門》爆hit　「負心」Kay追蹤舊愛FB

「最動人時光，未必地老天荒，難忘的因你太念念才難忘......」相信呢兩日大家都畀麥浚龍（Juno）同謝安琪（Kay）合唱嘅《羅生門》瘋狂洗版，連過氣情侶余文樂同吳雨霏唔知係咪勾起啲咩回憶，兩個不約而同喺Instagram上載咗呢首神曲，而《羅》推出咗短短三日，喺YouTube點擊率已經過咗75萬，相信好快就會突破100萬關口。<br/><br/>Juno同黃偉文、伍樂城炮製嘅《耿耿於懷》、《念念不忘》同《羅生門》三部曲，寫緊一個苦戀十年嘅淒美故事，唔少網民都大叫「虐心」，仲話呢首《羅》係首「鞭屍歌」，唔多唔少都同女主角Kay有關。<br/><br/>因為故事入面嘅佢相當絕情狠心，呢位「負心女主角」Kay接受《東網》電話訪問就話：「我已經將傷害減到最低，好多人話摧毀咗個男仔，但其實女主角個語氣，係用一個睇得好開嘅心，勸前度放低段感情。其實首歌最Hit到我嘅係，男女主角嘅角度、感受都唔同，個男仔好鍾意個女仔，但原來佢唔係真正了解對方。其實個女主角發現男主角10年嚟都咁執迷，個心都好酸。」<br/><br/>Kay貴為時下女神，現實必定有唔少男士會對佢死心塌地，問到有冇男仔好似《羅》入面嘅男主角咁對佢如此長情？佢就好怕醜咁話：「自己唔講得架喎，好囂屎咁。不過我會懷念過去美好嘅感情。」歌詞入面，男主角因為對女主角念念不忘，經常會Check住舊愛嘅Facebook，Update吓對方近況，原來Kay都會一樣咁長情：「慶幸同我相愛過嘅男仔都係好男仔，依家都做到朋友，會關心對方，我都會喺Facebook睇心儀嘅人嘅近況，所以呢首歌真係Hit到我。」<br/><br/>難得女神打開天窗，同我哋剖白感情世界，唔知佢同老公張繼聰嘅愛情故事係咪一樣咁浪漫？Kay說：「我哋開始拍拖時好成熟，唔會咁夢幻，反而似佢依家套《愛．回家》咁，寫實啲。」仲要幫老公順手宣傳新劇，果然恩愛到加零一！<br/><br/>至於聞者傷心，聽者流淚，好多戥佢慘情嘅男主角Juno接受訪問時，就話同大家睇法唔同，唔覺得呢首神曲殘忍喎：「作為創作嘅人員之一，我反而感覺唔係好殘忍，可能都係因為我覺得唔殘忍，覺得好淡然，而令到首歌更加殘忍。我覺得每一日喺日常生活裏面，有千千萬萬個故事發生緊，而我哋只係將個現實講出嚟。好多人覺得很悲，我覺得反而有種缺憾美。」<br/><br/>Juno又話好開心《羅》引起咁大迴響，身邊唔少人聽完首歌都喊餐死，佢話製作今次呢三部曲其實係想探討一個複雜議題：「就係有邊個未試過念念不忘？或者未曾耿耿於懷過？可以係一個人、一件事，一個感覺，佢係無分國籍，只要係一個人，有人性往往就係咁複雜。呢首歌係我同黃偉文親手摧毀咗呢個故事，一個延續咗十年嘅故事，係大家最估唔到嘅結局。」