東網電視
更多新聞短片
李錦聯（橙衫者））同大王久別重逢，今次仲爆出連環金句，10級爆笑！
1/10
每日播出嘅婦女節目《都市閒情》除咗吸引廣大家庭主婦收看，最近仲多咗一批年輕網民觀眾，皆因節目內嘅煮食環節主持安德尊（大王）與大廚李錦聯「煮」出火花兼大鬧笑料！唔少網民準時收睇之餘，仲為呢兩位「合拍無間」嘅主持起咗個名叫「都市兄弟」。久別半年嘅「都市兄弟」喺中秋追月當日再重逢，期間大王不但使出唔少得嘅「無敵鴛鴦鏟」，最後更疑似忍唔住火向李錦聯爆粗，精彩對話一段接一段！此外，有網民更為今次「都市兄弟」佳節重逢進行二次創作，加上字幕及Emoji，上載未夠一日就已經突破8,000點擊率！
趁住追月好日子，大王一開頭就同李錦聯講定數，叫對方醒醒定定：「嗱，師傅，今日中秋，團團圓圓，小心說話！」之後李錦聯腦袋急轉彎，爆出金句：「食咗牛仔骨，唔使亂咁噏」，原來今次「都市兄弟」煮嘅餸係牛仔骨！兩人一邊煮一邊互窒，期間李錦聯見大王手忙腳亂，更一度忍唔住喝止對方：「唔好郁住！」依刻大王聽完冇理會，李錦聯繼續喝：「叫你唔好搞咯！唔好搞住！」點知大王都係冇停手，李錦聯繼續瘋狂喝止：「唔好郁！唔好郁喇！由佢！由佢呀！」眼見李錦聯咁躁底，大王終於忍唔住問：「吖！師傅你點解講嘢咁得意嘅今日？你食咗咩呀今日？」點知李錦聯再爆無厘頭金句：「正所謂『食咗牛仔骨，中秋都唔會咳』，係咪？」聽完令人哭笑不得！
環節尾聲，李錦聯更有意冇意咁拍打咗大王幾吓，但可能不慎用力過度，似乎觸發到大王嘅神經。呢刻大王終於要爆，更作出最後反擊，笑笑口咁指住李錦聯話：「X！師傅！唔好咁大口氣 ，口臭呀！」唔少網民就話聽到大王疑似口快快爆粗，雖然火藥味濃，但係好搞笑！有網民留言話：「大王爆粗？好精警！」、「大王忍咗四年終於要爆！」
網民有話兒：
Ray xxx：直頭開個節目比（畀）佢地（哋）啦
Tofu Koo：火藥味好重
Mj Lxxxg：原來都市閒情咁好睇
Yanxxxx Yung：其實佢兩個係咪TVB做出黎（嚟）谷收視
Joxxxa Chan：大王真係好鬼百厭！
「東網巨星」fb專頁：
每日Keep住推介最「精」最「趣」娛聞，只需數分鐘，即可化身娛樂通，茶餘飯後唔驚冇話題。想加入熱議最hit最爆娛聞行列？呢個專頁真係不Like不可。
首先有李錦聯（左）嘅無厘頭金句，又幾押韻啵！
雖然兩人言語間火藥味甚濃，但依然笑笑口繼續主持節目。
李錦聯（左）唔客氣地向大王指指點點。
期間，李錦聯（左）多次呼喝百厭嘅大王唔好多手搞搞震。
各有各煮。
李錦聯（左）又再爆出搞笑金句，好Hard Sell吓啵。
大王（右）忍唔住向李錦聯還撃。
佢哋之間真係擦出唔少「火」花！
李錦聯（右）大力拍打大王背部時，大王仲一時口快快疑似爆粗添。
