【大蝦細？】安德尊扯宋芝齡耳仔被轟

藝人安德尊（大王）同宋芝齡一齊主持休閒節目《都市閒情》，最近節目仲加入新環節《安齡暑假冇時停》，喺27日播放嘅一集，大王同宋芝齡要去酒店體驗做房務員，佢兩個一開始已經不停鬥嘴，由於唔想輸畀港姐劉穎鏇嗰一組，宋芝齡非常落力，仲指揮大王要點樣執房。

當佢哋兩個收拾浴室嘅時候，大王係咁叫宋芝齡快手啲，宋芝齡就叫佢唔好嘈，仲話要慢慢摺毛巾，點知大王突然用手扯宋芝齡耳仔，質問佢睇唔睇到！呢一幕令到網民覺得大王大蝦細，話佢咁做好離譜。其實環節結尾嘅時候佢哋兩個輸咗，宋芝齡怪責大王，而大王都有跪地道歉㗎。其實佢兩個老友鬼鬼，打鬧都係節目效果啫！