演大奸角！陳志忠手刃大肚女友

新進功夫藝人陳志忠（Wilson）出席舞台劇謝票活動，並與其他同劇演員齊齊讀問卷。首次演出舞台劇的Wilson表示超興奮：「直播謝票時，我估唔到觀眾會記得我個名，但個個都叫我除衫，搞到我好無奈，不過有幾位觀眾表示對功夫有興趣同想跟我學習，我都好開心，依家多咗個途徑宣揚功夫。（睇問卷時有冇邊個意見最深刻？）好多人會覺得玩功夫嘅人好老土，而我今次為咗角色需要特別染紅髮，估唔到有觀眾大讚超型，亦大讚舞台上嘅武打設計好好睇好真，今次係我第一次為舞台劇設計武打動作，之前一直擔心效果唔好，但觀眾意見令我更有信心喺演戲同動作設計上發展，希望嚟緊會有多啲作品。」<br/><br/>Wilson亦透露在劇中飾演大奸角，連有了自己骨肉的女朋友都殺，惹來對方粉絲不滿，他笑言：「觀眾投入睇劇我哋好開心，其實平時嘅我講嘢都係陰聲細氣，我啲學生入場見到都話估唔到我可以咁兇殘，所以令我更相信自己可以做到呢種反派角色。」講到工作大計，Wilson透露多了內地公司邀請：「最近獲中央電視台邀請拍攝紀錄片介紹功夫，製作團隊拍攝好認真，同之前我拍過嘅功夫節目相似，所以我非常期待。另外都傾緊套內地網劇，要我打又要識搞笑。（對搞笑有冇信心？）雖然未做過搞笑戲，但依家一直有上演戲班，有專人指導同練習，應該唔難搞，都會睇多啲周星馳同王祖藍嘅戲參考。」