【票房聖手】李思臻一手洗走子華毒藥污名
20180601
東網電視
更多新聞短片
連星爺都有同佢合作！
今年賀歲片《棟篤特工》令黃子華一洗「票房毒藥」污名，身為該片編劇的李思臻（Kelvin）當然功不可沒。原本做地產經紀的他多年前在機緣際遇下認識雷宇揚：「佢有個情節揸唔定主意，佢叫我講吓觀眾嘅角度。佢話我有啲諗法，上佢屋企同佢傾，開始學吓寫劇本。」Kelvin坦言沒有想過會成為編劇，但因2000年時地產市道靜寂下，用工餘時間寫劇本，期後發覺不能在兩者上分配時間，加上對地產工作感到厭倦，故索性轉做編劇，直至2004年，電影市道轉差，令他的事業遇上樽頸位，北上發展數年後開始令他懷疑自己的才能，更一度想放棄。
人生轉捩點
幸好期後遇上其師傅，被譽為「周星馳御用編劇」的曾謹昌，並指出他的問題：「有一場戲寫咗八次。佢修改完我睇番真係好睇好多。」二人合作近四年後，曾謹昌有日帶他與周星馳見面，以「天才中嘅天才」來形容對方。對於星爺與他合作的《美人魚》當年大收旺場，Kelvin直言沒有想過：「當時諗有20億都唔錯，點知有成34億，都驚喜㗎！」
劇本為子華度身訂造
對於《棟篤特工》的票房成績理想，他表示好友監製陳穎倫最初找他為黃子華及佘詩曼度劇本，Kelvin笑言：「子華喎！唔搞都去見吓先啦！」他表示最初有想過為電影加入喜劇元素，但傾談數次後發現子華與星爺一樣，都是個人風格很強烈的人：「兩樣嘢好唔同。如果叫子華做星爺嘅嘢，第一佢會做得唔舒服，第二唔代表好睇，佢有啲偏向黑色幽默。」做了十多年編劇工作，Kelvin到今日依然未感後悔，因每次看到自己的作品都會有滿足感。
開工作室為電影圈培育人才
Kelvin與曾謹昌於深圳開設工作室將近一年，除希望一手一腳包辦電影創作外，更為電影圈培育人才：「唔想寫完劇本賣畀人就算。我哋有提議覺得好玩就去做，只不過我哋會加商業元素。」他解釋於內地開設工作室因市場大，亦可獲得更多資源，希望香港及內地的人才可以互相交流，為更多年輕人爭取更多機會。
--------------------------
東網巨星開咗ig喇，大家快啲follow啦！