山區探訪感觸深　邱芷微親自填詞

歌手邱芷微（Chelffy）出席美容展，她指向來注重護膚：「依家自己做好多運動，就令水份漏失，搞到皮膚都會好乾，特別喺冬天時更嚴重，搽cream亦要不斷補，所以要搵啲好強保濕嘅護膚品。（自己都好留意美容產品？）係，其實以前就冇特別理，但隨住年紀大咗，工作又要成日化妝嘅關係，會更注重平日保養同清潔。」

提到製作國語歌及推出慈善EP，今次Chelffy更會首嘗親自填詞：「因為個靈感嚟自我去完山區探訪後嘅感受，個填詞人就覺得個concept好好，同埋係我自己親身感受，所以就叫我試吓填，應該會喺下年2月推出。」