邱芷微做正面角色　怕觀眾唔習慣

歌手邱芷微（Chelffy）早前出席舞台劇發布會，並指將會喺劇中演醫生一角：「上個舞台劇我做幕後黑手嘅大奸角，所以我嘅戲劇老師兼劇導演話今次想我做啲正面角色。」Chelffy更笑言唔慣角色嚴肅：「平時我喺電視同廣告啲角色多數要我做八婆鬧人打交，觀眾大讚好過癮，我反而擔心今次太正常佢哋會睇唔慣，但我作為專業演員一定handle 到。」

向來熱心公益嘅Chelffy，還表示今年去不到山區探訪學童，故感到相當可惜：「我每年3月都會到雲南山區探訪學童，但今年除咗撞正排練舞台劇時間外，仲撞正一個慈善音樂會演出及一些春茗司儀工作，所以去唔到。（今年賺到豬籠入水？）希望係啦，成日喺慈善活動聽啲善長講話幫助社會上有需要嘅人就會有好報，所以醫生角色都幾啱我演，有愛心嘛。」