家庭第一!好爸爸吳家樂願為仔女作犧牲

2019年02月13日 14:40
東網電視
更多新聞短片
吳家樂處處為仔女着想,真係一個好爸爸!

藝人吳家樂出席大家樂集團「區區開年飯2019啟動禮暨首場開年飯」活動,他表示新年期間沒有出埠,因為要拍攝新劇《唐人街》:「食咗好多蘿蔔糕,唔敢偷懶喇,因為套劇要打,全部都要除衫。」講到早前被網民拍得新年前夕一家五口去日本旅行,他表示:「其實係聖誕節,當地都有好多香港人,冇乜所謂啦。其實我湊仔好正常啫,但香港人通常生一個起兩個止,我就生比較多。」

提到早前跟古巨基(基仔)、劉愷威等在初二聚會,家樂笑說:「因為基仔嘅演唱會,所以我哋成班出嚟,其實本身同愷威係訓練班同學,又係明星足球隊,所以一直都有聯絡。好多時大家都會奇怪原來我同阿邊個熟落,其實一路都有,只係依家網絡發達,擺張相畀大家見到,好似我當年都有睇住傅明憲試鏡,因為我嗰陣時做緊幕後。(有冇問愷威最近嘅心情呀? )我哋好少提,好似同基仔識咗咁耐,都冇問過佢同Lorraine係咩關係,直到佢同我講話佢結婚,我就話『哦』、『係呀』,你都知我幾不問世事㗎啦。」

家樂透露自從有小朋友之後,經常都很忙碌,有很多事要擔心。就算小朋友放假,他亦要工作,所以都無暇顧及其他事情,但他認為為小朋友犧牲是很正常的事。問劉愷威可有跟他傾湊小朋友經?他謂:「時間唔同咗,我out咗喇!我嘅小朋友同佢嘅小朋友莫講話隔十年,就算隔兩三年,學校制度都唔同晒,所以只可以作參考,我哋係有傾過讀書嘅嘢,父母一定畀最好嘅嘢仔女。」他自言經常看到一些社會新聞,認為生離死別的事沒人能預知,所以會花時間做多些善事,亦認為一家人可以齊齊整整、健健康康,已經是最重要的事情。