再戰樂壇！天堂鳥新MV晒肌床戲回饋粉絲

闊別樂壇年多的三人男子組合BOP（天堂鳥），近日簽約新公司重新出發。成員葉灝基（Gordon）、許俊豪（Lincoln）和歐鎮源（Tyrese）為了讓樂迷有耳目一新的感覺，特別揀選抒情慢歌《故作瀟灑》作為「回歸樂壇」的首支主打歌。MV中Tyrese更獲隊友Gordon及Lincoln推舉，負責出浴鏡頭，回饋樂迷呢！

BOP近年其實一直作出不同的嘗試，除了推國語歌打入內地市場外，亦有參與多部電影的演出，電影雖還未上映，但樂迷可透過MV看到三子的演技，新歌講述主角與女友分手後仍念念不忘，雖然仍然深愛對方，但卻要表現得灑脫，放得開，導演為了將主人翁的心情具體化，特別為BOP安排了三位女生，於MV中扮演他們的女友，更有不少互動，如Gordon有孭起女友的畫面，Lincoln則要邊玩層層疊邊冧女，至於Tyrese更要與女友上演床戲，在床上親暱地Selfie。

對於是次以抒情慢歌再戰樂壇，三子表示很想讓大家看到組合的蛻變，談到MV中與眾女角互動，Lincoln稱導演給予很大的發揮空間，可謂考驗演技，他說：「因為我要同女友玩層層疊，要諗點樣可以演得Sweet啲、多啲互動，但因為係第一次見，對方唔多出聲，場面有啲尷尬。後來同導演提議拖手、掩臉呢啲戲份，令到氣氛都變得輕鬆，結果拍攝時間亦係三個之中最快。」至於Gordon則自爆甜蜜背後原來有啲「惡啃」，他說：「我要同女友煮嘢食兼互餵，但實在唔知畀乜嘢反應，更重要係食嘅粟米片冇落奶，要齋啃，但又要表現得好Sweet，搞到我好尷尬，面都紅埋。」

單身了好一段日子的Tyrese則靦覥表示：「好似好耐冇接觸異性，所以拍攝過程中都有啲怕醜，因為要喺床上影相，又要哄瞓覺，但都係帶出感覺嘅畫面。」除了床戲，Tyrese更有出浴鏡頭，他說：「由籌備到正式拍攝期間只有兩個星期，而導演構思時覺得如果有出浴鏡頭效果會好啲，Gordon同Lincoln聽到後推我出嚟，但喺短短兩星期內我實在減唔切肚腩，好在導演話影唔到肚腩，我都可以安心啲！」話雖如此，Tyrese在埋位前也不敢怠慢，狂做掌上壓，務求展示最佳身段。

----------------------------

東網巨星開咗ig喇，大家快啲follow啦！

https://bit.ly/2JjSVcr