「苦」視后！李佳芯燒積蓄養家　11蚊都要借

不少人都覺得視后李佳芯（Ali）好運，在無綫短短幾年便榮膺視后，就連她本人亦認同。不過，一句幸運似乎就抹殺了她在背後付出的努力及辛酸。由模特兒、主持到演員這十數年間，Ali也經歷過銀行戶口結餘不足一百元的窮日子，她接受東網專訪時把這段苦日子娓娓道來：「呢行好多人都試過，當年我啱啱讀完書出嚟做嘢，真係要朋友過11蚊去我戶口，先夠100蚊可以撳到錢。頭幾年係好吃力，做呢行要置裝又要化妝，但人工又唔高，我唔會問人借錢，都係靠碌卡度日。」後來收入增加，總算有點積蓄，Ali卻毅然決定由有線主持轉型演員，她自認個性衝動，只要有念頭萌生，即使跪着也要走完自己選的路：「減咗好多人工過無綫，我又要養家，但當時嘅人工係連自己都養唔到，有段好長時間都係用積蓄補貼，我唔知道可以捱幾耐。」事實證明Ali選對了，她自嘲當模特兒時自己只有軀殼，因不擅表達，故主持工作亦非她所長，結果在演戲當中找到最舒服的位置。

被陷害最無力

拍劇初期演盡壞女人角色，直至首次擔正劇集《律政強人》，終嘗當好人的滋味，不過亦是她最感無力的一次：「我每場戲都係畀人害，個反應都係一樣，我不斷問自己係咪要有啲變化？但又唔知點變，好似萬變不離其中咁，演得好冇自信，無所適從。呢個會係我最想重新演繹嘅角色。」Ali從來不擔心角色乞人憎，就算再演小三或壞女人亦無任歡迎，因她認為不論現實或戲劇世界都沒有絕對的好人與壞人。

演繹每個角色時，Ali都要拋開很多的自己，又加入很多的自己，她予人理智、波瀾不驚的印象，跟她在熱播劇集《白色強人》中程洛雯醫生的角色性格頗為相近，不過Ali覺得自己與角色又不盡相同：「程洛雯唔係對病人冇感情，但佢唔會表現出嚟，就好似我個樣好淡定，但其實裏面係小鹿亂撞，情緒波動得好犀利。」又以「自閉」形容自己：「我係有好多情緒，但我唔識得用言語表達出嚟，我係感受大於言語，會同你講我唔鍾意或者我唔想，但我講唔到更多。」

拍拖無聲勝有聲

至於程洛雯對愛情的直白就跟Ali的被動截然不同，劇中跟馬國明及唐詩詠發展三角關係，更從未發生過在她身上：「我試過暗戀同一見鍾情，但只限於小朋友階段，讀完書之後就未試過主動鍾意人，因為我係一個冇安全感嘅人，對自己有信心、要知道對方係好鍾意我，我先敢將個心放出去。」

Ali與陳炳銓拍拖近五年，她指男友是個敏感而且缺乏安全感的巨蟹座男人，或許是「負負得正」，只有性格相似才能互相體諒：「我哋會有共識，雖然唔出聲，但知道個心喺度。佢私下冇乜表情又好少講嘢，但都係有好多情緒喺入面，呢方面同我最相似。」

場地：Madame Fu Grand Cafe Chinois

服裝：initial fashion

化妝：Stephen Lau

髮型：Zap Tang@Essensuals.hk

---------------

立即參加「賞您睇」：http://bit.ly/2JWKULh

Click下面粒掣，儲on.cc coins！機票、家電、超市禮券、過萬份獎品等緊你。