一吐烏氣！馬國明星洲稱帝　唐詩詠封后

藝人馬國明、唐詩詠、李佳芯、韓星朴敏英等昨於新加坡出席《星和璀璨星光夜2019》，馬國明與唐詩詠憑劇集《白色強人》奪得「星和無綫電視大獎」最佳男、女藝人獎，成為新加坡視帝、視后，詩詠領獎時一度眼濕濕，李佳芯則奪得TVB最喜愛角色獎。

團隊比個人重要

馬國明獲封視帝感到非常高興，並謂：「要多謝《白色強人》監製、編審以及整個團隊，唔知係咪人大咗，演戲愈耐，愈覺得成個團隊嘅力量比個人力量更重要，觀眾喜歡呢套劇，都係因為成個團隊凝造出嚟嘅氣氛，無論道具、場景、打燈、梳化服等，都好重要，所以要多謝台前幕後每一位工作人員，仲有一班協助我哋拍攝嘅醫生、護士，冇佢哋，我哋嘅專業感都冇咁強。總之，團隊威力，係我拍呢套劇最深刻嘅感覺。」

全年得一套劇

《萬千星輝頒獎典禮》於明年1月舉行，馬國明現率先於新加坡稱帝，問會否令他對香港頒獎禮奪獎的信心大增？他謂：「要分開兩件事嚟睇，每一個頒獎禮嘅評審標準都唔同，唔會話拎咗一個，就可以拎埋另一個，隨遇而安，盡咗力喇！」至於唐詩詠奪得視后獎，馬國明則表示：「開心，佳芯都有攞獎，鄭俊弘主唱嘅《白色強人》主題曲都有獎，總之，呢個劇攞乜嘢獎都好，我都非常開心，因為我今年得呢套劇係有份參與，一定撐到底。（打算點慶祝？）請劇組食飯，其實攞咩獎都好，都可以食，就算TVB台慶嗰晚我拎唔到都可以食，冇乜所謂，最緊要整個劇組團隊開心。」」

最想《白色強人》攞最佳劇集

唐詩詠對《白色強人》於星和掃獎，笑言：「好開心、好感動，呢個係《白色強人》第一個獎，要多謝整個團隊，大家拍嘅時候都抱住一個未知心態，因為呢個劇同過往劇集好唔同，唔知觀眾喜唔喜歡，依家我哋知道觀眾真係鍾意，冇監製、編審、攝影師等台前幕後就冇呢套劇，雖然唔係台慶劇，但拍嘅時候大家個心態都係衝咗先、博咗命先嘅心態，好多嘢都係未知之數，依家成功咗好感動！」

談到馬國明奪獎，詩詠很開心，並謂：「梗係要馬國明攞獎，我哋合作嘅時候冇諗自己有冇（獎），只係好想佢攞到獎，仲有Fred（鄭俊弘）都有攞主題曲獎，都係好開心。」今次揚威新加坡，問詩詠有沒有想過在無綫萬千星輝頒獎禮中，可以繼續掃獎？她謂：「我好希望可以攞最佳劇集，但都要交番畀觀眾投票，不過今次攞獎，可以令一啲已經忘記咗呢個劇嘅觀眾，記番起少少我哋套劇，投最佳劇集一票。（唔想攞台慶視后？）呢啲隨緣，團隊拎到大家開心呀嘛！」

---------------

立即參加「賞您睇」：　https://tinyurl.com/y2e6pmwk

Click下面粒掣，儲on.cc coins！機票、家電、超市禮券、過萬份獎品等緊你