東網電視
更多新聞短片
留意番，嚟緊有勁多靚相，小心Data呀～
1/13
社交界盛事巴黎名媛舞會（Le Bal des Débutantes）喺11月30日舉行，出席嘅名媛之中就有幾位圈中星二代，不過要數最吸睛嘅就一定係國際武打巨星李連杰與前亞姐冠軍利智所生嘅大女Jane，以及昔日性感女神邱淑貞大女沈月，兩個人由試戰衣開始一路鬥到正式舞會，真係難分難解，而今次仲要唔止兩個星二代鬥，依家仲有李連杰同邱淑貞親自陪愛女「出征」，一樣咁令人目不暇給！
先講大家都熟悉啲、18歲嘅沈月，早年得到「最索星二代」頭銜嘅佢，今次當然有番咁上下水準，一襲低胸閃石半透視粉紅色高衩羽毛晚裝，隱約晒出3吋事業線，真係令人眼前一亮，夠晒俏皮嘅佢挽住外籍男伴出場時，更撒嬌賣萌可愛到爆，媽咪邱淑貞就由頭到尾舉機影阿女，Sweet到呢～
至於利智19歲大女Jane，之前就因哈佛學霸身份引起關注，今次佢就以一身酒紅色Low Cut長裙配同色薄紗披肩示人，大騷知性美，而且喺兩張官方大合照中，佢都企喺中間位非常搶眼，爸爸李連杰今次都傍到實，一時同阿女溫馨共舞，一時又變粉絲舉機狂影，成個有女萬事足嘅樣出晒嚟！
沈月出場，成個公主咁Pink～～
沈月呢條裙都冇得頂～
官方合照中，沈月喺最後排左二，利智大女Jane就喺中排左四。
合照梗係唔少得。
拉埋媽咪邱淑貞（左一）同男伴合照。
兩母女都微晒事業線，直頭有網友話似姊妹！
Jane都係挽住外籍男伴出場。
兩家人都有合照啵。
原來阿妹沈日（右一）都有一齊去啵，同媽咪餅印一樣。
男伴下跪錫手仔，沈月Cute爆嘅反應都畀後面嘅邱淑貞影低晒。
同爸爸李連杰共舞，阿爸個樣開心到～
Jane又靚又係學霸，真係殺晒。
