演過《戀愛自由式》！鄧麗欣隔17年再拍港劇

藝人鄧麗欣（Stephy）昨日（26日）與顧定軒，於天水圍為ViuTV新劇《男排女將》開工，久未拍攝港劇的她，笑言閉關近兩個月是全新體驗：「好耐未試過拍一套戲拍咁耐，通常喺香港拍電影最多都係一個月就完成；我入行第一年（2003年）拍過無綫劇電視劇《戀愛自由式》之後，咁多年都冇喺香港拍過，一開始唔係好習慣，但係拍咗咁耐之後，慢慢同劇組、演員增進感情，大家好似一家人咁，我見佢哋仲多過見我媽咪，感覺好親切。」

新冠肺炎疫情肆虐，她不諱言拍攝進度也受到影響：「套戲有好多時會喺室內運動場、公共地方取景，所以好多場口都要暫時停拍，亦未知場地幾時重開。拍埋今日之後會停一停，等待消息。」她還指該劇原定要拍攝一場咀戲，但因為要「避炎」而取消：「原本我同阿Sam（陳宇琛）有場比較親密嘅戲，本身係要Kiss嘅，雖然只係蜻蜓點水咁錫，但係大家喺互相尊重嘅情況下商議過，決定借位拍攝。」