幕後走進幕前　林家謙行山被認出

創作歌手林家謙接受TVB娛樂新聞台節目《StarTalk》專訪，大談成功由幕後走進幕前感受。家謙表示：「開心四個台都有少少收獲，不過電視台嘅唱作新人獎最估唔到，因為自己喺電視曝光唔算多，電視觀眾應該唔太認識我，今次係一個好好嘅肯定之外，亦令好多親友知道我攞獎。有件事都幾有趣，早排行山有人認得我，話我係唱《下一位前度》嗰個，唔再話我係作《矛盾一生》嗰個。」

家謙表示自去年做歌手後，其創作作品的確減少，他說：「上年創作嘅作品真係一隻手數得晒，係我咁多年嚟寫得最少嘅一年，上年要花時間做幕前、統籌同宣傳工作，令創作空間同靈感都少咗，希望今年多番啲創作。依家做幕前都開始習慣，唯一唔慣就係台上唱歌，另外嗰一隻手唔知點，有時插褲袋，又會五指朝天，依家仲好似指揮咁，其實把聲係會因為個Body Movement而有分別，好似之前頒獎禮拎住個獎唱歌好唔自然，唱高音有啲影響。」