《降魔的2.0》馬國明一王三后:係幾好艷福!
20200503
東網電視
更多新聞短片
![](/hk/bkn/cnt/entertainment/20200503/photo/bkn-20200503230056128-0503_00862_001_01p.jpg?20200504130640)
《降魔的2.0》嚟喇!
馬國明、黃智雯及劉佩玥(Moon)等主演新劇《降魔的2.0》將於今晚8時30分於無綫翡翠台首播。這部25集的電視劇承接兩年多前上集收視的餘威,由籌拍開始到推出,觀眾都引頸以待。馬國明飾演的馬季今次不單「升呢」有降魔服妖能力,更周旋莊芷若(黃智雯飾)、貝貝娜(劉佩玥飾)及阿花(譚凱琪飾)之間,他說:「上集講到我嘅疏忽令Moon冇咗條命,今集佢對我仍未心死, 所以留戀凡間,但我本身鍾情黃智雯,夾喺佢哋中間我唔知點處理,劇裏面我同佢兩個都有少少親熱戲,係幾好艷福嘅。至於譚凱琪係我揸的士嘅熟客,佢嘅身份當然唔係咁簡單啦!」
黃智雯化身「港版孔孝真」
上集演醫生的黃智雯今次「進化」到能夠感應亡魂,身份與經典韓劇《主君的太陽》女主角孔孝真異曲同工。她說:「兩者有啲相似但唔盡同,印象比較深刻嘅有場戲,講我喺急症室見到個『小朋友』,佢原來一直畀父母虐待,但佢忍氣吞聲,原來背後隱藏咗一個動人故事,相信會感動到觀眾。」新加入負責扮演「風獅爺」一角的C君,視黃智雯為女神, 性格「鹹鹹濕濕」,將沉重的劇情加入輕鬆元素。
據悉劇情將高潮迭起,監製方駿釗「安排」馬國明走進幻景內的時光隧道,重遇生命中重要的人如阮小儀及何遠東等,留戀的感覺令他徘徊在放棄及繼續尋找出路之間難以抉擇,客串演出的林凱恩懷着「魔胎」,目睹馬國明兩次先後「殺死」自己的至愛黃子恆,立誓報復。而上集「死去」的石敢當(胡鴻鈞飾) 與莫有為(蔣志光飾)「捲土重來」,前者改以馬國明義弟「豪仔」身份登場,後者「變身」馬國明忘年之交「艾鐵文」,一眾降魔粉絲必定感親切。
鄧佩儀胡鴻鈞咀唔停
鄧佩儀(Gloria)今次於劇中飾演「降魔富二代」施萊斯,與「豪仔」胡鴻鈞有感情瓜葛,然而早於二人愛上對方前,因法力問題已經常「咀唔停」,二人更被安排一場重頭戲,於水上凌空跳舞營造浪漫Feel,難怪Gloria笑說﹕「我哋咀嘅次數真係多到數唔到,有時唔同機位、唔同角度拍攝都要再咀。其實起初我哋都有啲尷尬,咀到後嚟大家埋位好爽快,總之我未試過拍一套劇需要拍咁多咀戲!」
Gloria於劇中接受多種不同挑戰,令她十分享受過程:「好似打鬥、吊威吔、跌落海咁,樣樣都試過,拍嘅過程真係好刺激!對我嚟講今次挑戰好大,同埋好有發揮。」她笑言倘若自己與胡鴻鈞的「情侶檔」令觀眾受落,希望日後繼續能夠拍住上搵真銀!
謝雪心痛別愛子爆晒Seed
謝雪心與胡鴻鈞的「母子情」在續集內得以延續,胡鴻鈞今次擺脫「石敢當」影子,以謝雪心兒子「豪仔」身份登場,無奈人鬼殊途,二人面對「分手」慘痛欲絕,謝雪心將來次演技爆Seed,誓要令觀眾「悲同感受」。
與此同時,蔣志光亦告「翻生」, 客串飾演上集「莫有為」外,再以科研專家「艾鐵文」身份加入劇中,並與謝雪心發展「感情線」,牽涉人物及劇情複雜,名副其實演技大挑戰。