陳凱琳賀老公入「五」！鄭嘉穎宣布再做老竇

前港姐冠軍陳凱琳（Grace）去年為老公鄭嘉穎誕下兒子Rafael，早前再傳出懷有第二胎，年屆50歲嘅鄭嘉穎今日喺社交網發文，指囝囝Rafael將做人哥哥：「Rafa is going to be a big brother soon!」正式宣布懷孕喜訊！佢晒出多張「一家四口」合照，並攬住Grace深情對望，當中見Grace雖然着上黑色鬆身裙遮肚，但都明顯已經見肚。

Grace接受東網訪問時笑言：「多謝大家關心，真係好開心，終於可以宣布，第二胎佗得都好穩定、好好，屋企人、特別係老公都好照顧我，所以心情好好，希望繼續開心佗BB。第二次做媽媽都有心理準備，所以都放心嘅。」

而Grace亦有發文報喜：「Rafa好快就要做哥哥啦~ 好開心可以喺『520』宣布我哋家庭將會多添一個新成員！喺呢段日子好感激我老公嘅細心照顧，亦都要多謝屋企人同朋友幫我保守呢個秘密同時送上充滿愛嘅祝福畀我哋！」

鄭嘉穎回覆東網說：「有咗家、有咗老婆、有咗小朋友、先知道世界上最大嘅樂係天倫之樂。結婚之後過得好開心、好充實，好期待新成員嘅來臨，開心到爆。」