陳柏宇講明唔會請婆婆去旅行　爆長輩好有錢

歌手陳柏宇（Jason）出席ViuTV節目《玩．謝我阿婆》記者會，Jason透露節目係兩年前拍落，當時公公亦有同行，不過冇喺節目中露面。

Jason透露並非第一次同婆婆去旅行，之前細個經常同婆婆返香港：「唔知點解之前細個好鍾意返香港，揀去邊我實揀香港。」講到日後待疫情好轉，會否出錢請婆婆去旅行？Jason竟然拒絕，指公公婆婆比起自己有錢得多：「佢哋夠錢請自己，因為佢喺加拿大包糉包咗廿幾年，又開過食品廠，但其實利潤好細，不過佢哋好勤力，雖然依家退休賣咗畀人，但仲有好幾個舖位收租，加上佢哋啲樓同子女又供好晒，我就話有排供啫。」

問到會唔會下次挑戰帶外母、媽媽、婆婆同埋老婆一齊？佢笑言已經試過，相處冇問題：「之前去英國影結婚相，兩家人廿幾個一齊去啦，我老婆又同過我媽去旅行。（冇問題？）冇事，幾好呀！」