李蕙敏開船P慶祝「入五」

歌手李蕙敏（Amanda）日前正式「入五」，迎來50歲生日，除了跟家人食飯慶生之外，還孖老公及兩歲養子登上雲翔導演的船，出海開P慶祝，亦有邀請小量朋友，如音樂監製Damon Lau加入同賀，場面非常熱鬧。

Amanda受訪時，表示今年生日過得好開心，又笑言因為玩得太盡興，而第二朝起身好攰︰「俗語話呢個年紀（50歲）係乸住乸住，生日願望係希望我同埋錫我嘅人，身同面都唔好乸住乸住，知道大家喺呢段時間，因為外面個情況，情緒都易有起伏，但都要盡量樂觀，仲有就梗係小朋友健康成長、開心，最擔心都係佢㗎啫！」

她感恩身邊有好友陪伴︰「咁大個人，有好多上上、落落嘅經歷都試過，識到一啲好嘅朋友，又有屋企人嘅支持，人容易滿足就開心㗎啦！」講到她趁生日開Group發起籌款活動，希望各方好友以捐款代替送禮，而受惠的是兒童慈善機構，Amanda指因個人比較偏向幫助兒童機構。