陳茵媺行山疑遇毒蛇　小朋友唔識驚想上前玩

前港姐冠軍陳茵媺（Aimee）不時帶子女遊山玩水，日前佢哋再次出動到南丫島行山，豈料竟驚遇一條青色嘅疑似毒蛇，幸好Aimee處變不驚，最後無驚無險平安度過。佢喺社交網發文透露當時大仔Aiden險踩中蛇，佢及時發現立即尖叫並拉開大仔，不過同行小朋友就完全未有受驚，反而上前打算同青蛇玩耍，惟Aimee認為青蛇好有機會有毒，故隨即阻止仔女。照片即引起網友討論，其中好友朱凱婷就留言指該青蛇毒性強勁，幸好冇發生意外。