TVBuddy X 生啤！吳業坤193合唱　網民嗌期待

歌手吳業坤早前上載同ERROR成員193（郭嘉駿）合照，一個TVB一個ViuTV，自然引起網民熱討佢哋呢個咁出奇嘅組合，更擔心吳業坤被照肺，之後佢透露係傾喺網上平台合唱！話口未完，佢就上載咗張兩人揸住兩台吉祥物「TVBuddy」同「生啤」合照玩交換禮物，留言：「冇放飛機！」有網民就留言：「友台做朋友，SUPER?！」又問吳業坤有冇問候吓對方早前接受懲罰「細佬」受創仲痛唔痛！

另外，佢又上載咗份歌詞，上面寫住代表兩人個名嘅「193」及「KG」，混合咗ERROR首《我們不碎》及吳業坤嘅《玩具成熟時》！而另邊廂，193亦晒出錄歌時照片，見到吳業坤喺相中！究竟佢哋呢次係咩合作？唔少網民都話好期待佢哋搞邊科呀！而193收到TVBuddy之後都手多多，放咗兩支煙喺TVBuddy手上！