潘瑤馬國開工被騷擾　搵曾頌珊求救

曾參加ViuTV《廣告女皇》節目嘅曾頌珊（Kiddie）同藝人潘瑤（Yoyo），最近合作由香港與馬來西亞合拍嘅青春動作喜劇，二人更飾演女主角黃寶瑤嘅好朋友。Yoyo指戲中角色係一名電競選手兼運動全能，所以事前都做足準備工夫：「首先練好自己個體能，嗰段時間不停做運動，之後又睇好多電競比賽，希望令出嚟個效果更加真。」又自爆喺馬來西亞時曾被騷擾，至今仍然令佢很難忘：「當時得我自己喺酒店，之後聽到外面有個男人好嘈，當我開門睇吓發生咩事，點知個男人就望住我，仲不停瘋狂拍門，我嗰刻勁驚，即刻打畀Kiddie，幸好最後劇組啲人趕過嚟先冇事。」

至於Kiddie則指今次拍攝很開心，皆因能夠同Yoyo齊齊合作，仲話佢哋趁呢次拍攝空餘時去當地唔同夜市逛：「我哋去齊7個夜市市集，真係體驗到馬來西亞嘅慢活。除咗拍攝以外，我哋大部分時間都係做gym同喺房內對戲。」