馮凱淇夫妻檔搞廣播劇　陳渃晴得把聲！

由馮凱淇（Cherry）編劇、馮迪燊（Tiksan）以Lovaholic夫妻檔名義，製作及監製嘅愛情廣播劇《喜歡你的味道》終於推出，佢哋兩公婆話《喜》廣播劇女主角陳渃晴（前名：陳亭嘉）外形性感甜美，兼且多才多藝，明明是「靠樣搵食」，今次居然要她「得把聲」。

Cherry和Tiksan又碌人情卡，請咗袁鎮業、阮頌揚、馬嘉均、奧米嘉儀、曹震豪、林柏希等任演員。問到最深刻嘅一幕，Cherry說：「馬嘉均聲演嘅前度男友Kelvin同女主角Tracy嘅一場鬧交戲。佢哋啲入戲程度震懾到我。我仲聽到起雞皮，佢哋兩個帶我投入咗角色，感受到情侶鬧分手嘅心痛。」

點解會揀做有聲有影像嘅廣播劇？原來Tiksan當年入行成為電台主持正正就是因為「廣播劇」，Tiksan說：「當年偶然聽到一套廣播劇叫《太初》，覺得很精彩，於是每日同一時段打開收音機收聽，卻奇怪一直等不到廣播劇播出，呢套廣播劇引發起我對廣播嘅興趣，到加入了電台先發覺自己原來當年聽錯台！」