舊作被翻出!黃貫中獲封「被音樂耽誤嘅畫家」

2021年09月13日 20:01
東網電視
更多新聞短片
前樂隊Beyond成員黃貫中(Paul)最近因為參加內地真人騷《披荊斬棘的哥哥》而人氣翻升,唱得好之餘,亦彈得一手好結他,其實佢除咗有音樂才華外,亦好有藝術細胞,最近有網友就摷番佢啲畫作出嚟,話佢係「被音樂耽誤嘅畫家」。
聽講阿Paul唔拎起結他rock時,就鍾意揸住支畫筆日以繼夜咁畫畫畫,好似最近佢就用水彩畫咗33位哥哥嘅背後剪影,成棚人一字排開企遠眺夕陽,意境有詩意,畫功有張力,好畫一幅。
曾經講過「用音樂繪畫,用畫筆做音樂」嘅佢,玩音樂玩咗30年,畫畫就堅持咗40年,佢話自細夢想就係做畫家,可惜屋企經濟環境差,但又慶幸阿媽好支持佢嘅夢想畀錢佢學素描同油畫,用屋企甩咗漆嘅牆壁代替冇錢買嘅畫紙,之後讀埋美術基礎課程,再入香港理工大學修讀設計系,所以佢畫畫嘅年資比玩音樂更長。
除咗支畫筆掂,佢係美術設計方面亦好強,佢幫過好多樂隊設計海報,當然更加會照顧自己友,1985年Beyond開《永遠等待演唱會》嗰張海報就係出自佢嘅創作,仲有樂隊自費嘅第一個作品《再見理想》卡式帶嗰個懷舊feel封套面,所以就算Paul唔再靠唱歌搵食,轉行做設計師或畫家一樣唔會餓死。