重返樂壇出師不利　林峯搵鄧智偉救亡

演而優則唱嘅藝人林峯今年7月重投樂壇做「華納一哥」，推出個人單曲《唱情歌的人》，棄用「御用作曲人」鄧智偉，換上唱作新人王林家謙度身打造新歌，更大搞線上音樂會造勢，可惜於5台歌曲流行榜成績未如理想，全部十大不入，有指因佢未能親身到電台、電視台宣傳，而令歌曲慘成炮灰。

未知係咪見重返樂壇第一擊出師不利，呢日林峯就急急搵來合作無間、為佢帶來無數獎項嘅鄧智偉再度合作，更預告將推出9年前大熱歌曲《幼稚園》嘅續集，勢必收復失地！佢喺社交網上載與鄧智偉、老婆張馨月及一眾好友嘅合照，並留言表示：「九年逝去，幼稚未完，兄弟重聚，未來可期。歌名未定，期待有才華的Honey們給出建議，為此次再續前緣添上點睛之筆。」