Anson Lo吸金力稱霸！姜濤居然只得第3名？

嚟到年尾，唔少網上平台都發布年度人氣榜，近日再有平台發表10大最受廣告客戶歡迎嘅KOL，其中一直橫掃人氣榜嘅男團MIRROR，繼續贏到開巷，吸金力強勁！見MIRROR嘅4位成員姜濤、Edan（呂爵安）、Anson Kong（江?生）及Anson Lo（盧瀚霆）均榜上有名，其中Anson Lo更係繼續力壓姜濤，成為冠軍！

值得一提嘅係，向來係人氣王嘅姜濤唔單止輸畀Anson Lo，仲要屈居第三，究竟係咩人贏得過姜濤？原來係知名旅遊達人小斯，憑分享旅遊資訊大受廣大網民喜愛嘅佢，於網紅界屹立多年，更曾與陳俞希拍攝ViuTV旅遊節目，以往佢喺同類榜單都幾乎坐穩三甲，難怪可以跑贏姜濤。

另外，榜單上亦有唔少由藝人轉型嘅網紅，包括靚媽陳倩揚、宅男女神孫慧雪、「得閒修女」劉小慧等，而深得媽媽界歡心嘅陳琪更只輸畀姜濤，排行第4！今年繼續上榜嘅孫慧雪於社交網轉發榜單，並留言：「雖然唔知點計，但Top 10可以榜上有名，都係一種鼓勵！今年都要繼續努力，分享多啲扮靚同保養心得畀大家。」