造星IV｜COLLAR正式誕生　邊8位有份入女團？

ViuTV選秀真人騷《全民造星IV》上月25日總決賽由邱彥筒（Marf）、沈貞巧（Gao）及Day（許軼）分別奪得冠、亞、季軍，直接奪得女團席位。而ViuTV今日（12日）在尖沙咀舉行《Hold Your Breath》Debut Stage記者會，正式宣布新女團組合誕生，一如東網之前預測，名單包括冠、亞、季軍Marf（邱彥筒）、Gao（沈貞巧）及Day（許軼）外，其餘5位還有人氣王Ivy So（蘇雅琳）、WINKA（陳泳伽）、芯駖（李芯駖）、So Ching（蘇芷晴）及Candy（王家晴），組成8人女團，團名叫COLLAR。

35歲的芯駖雖然是女團中年紀最大的一位，但舞功與女人味都滿瀉，有傳將會成為女團的隊長。而25歲的So Ching在《造星IV》被分配為A組，近幾年她都有為MIRROR成員伴舞。WINKA就於決賽當天演唱《母系社會》，大騷強勁唱功。Candy年僅18歲，她為籃球健將，走鄰家女孩路線，但又不失硬朗。而Ivy So決賽當日演唱《勿忘》，雖然實力麻麻，但仙氣打扮網民卻非常受落。另外，COLLAR今晚11時將會在社交網開live跟網民見面。

記者會上，COLLAR經打造後，個個都增齡變成熟味，特別Candy全身名牌套裝閃片Look，恍如闊太。現場她們獻唱團歌《Call My Name!》，COLLAR團名代表衫領和鎖骨，女性最性感地方，《造IV》總決賽於去年12月25日舉行，到今日女團誕生，成軍只有18日，她們已經完成新歌MV，及將於明天播出，今日更宣布今年將會開演唱會。

主持強尼逐個訪問隊員的心情，踢爆Marf知道芯駖入團時，開心到攬住芯駖喊。Marf解釋第一日返公司，當日因為她是最遲一個到，其餘7人全伏在枱上，要Marf玩估人仔，Marf說：「我搵唔到芯駖個大寶袋好驚，諗起佢成日話自己年紀大，自怨自艾，但我又好想同佢合作，知道佢入團就好感觸。」

芯駖笑言估不到Marf如此激動，自己也估不到有份入團，她透露總決賽第二日就收到經理人Wing的電話，芯駖說：「26號我瞓到下晏5點，Wing問我有冇興趣加入女團，原本我夜晚約咗人食飯，即刻取消飯局去簽約。」

近日「我老婆嫁咗畀MIRROR導致婚姻破裂關注組」的版主已經開設新facebook群組「前夫反擊戰」支持COLLAR，「前夫」開新群組反擊 短短幾日便有5萬followers。女團由GAO做隊長，笑言會輪住做，好像值日生，又講笑因為自己最矮，但否認口才好，她說：「只有2、3個禮拜準備，時間好短，有少少攰，不過好興奮，少少瞓唔着。」Day說自己瞓得好好，其他隊員齊聲說：「Day係擔當瞓覺」COLLAR出道即宣布開騷，視乎疫情情況，預計3月開騷。

芯駖為全隊中年紀最大，邁向36歲的她，被網民封為「36駖」，芯駖完全不介意，沒有好大壓力，她覺得一個女團有不同年齡女仔，可以代表不同女性思想和想法。「由參加比賽時已經習慣咗，大家相處咗咁耐，年齡距離不是問題，反而會互相照顧。」Marf就爆芯駖好多「甩轆」經常不見電話。對於「前夫反擊戰」followers愈來愈多，她們齊聲Wow了一聲，表示多謝，Marf說：「唔知大家記唔記得我講過，之後要收埋「老婆」和「老公」，希望給予唔同年齡層都鍾意我哋。」GAO就講笑說：「歡迎兩公婆加入，唔使離婚，一齊支持我哋。」Marf更大膽定下要「超越」師兄MIRROR，芯駖希望互相良性競爭。