呂慧儀出動劉丹幫口　望張景淳早日「回家」

無綫處境劇《愛．回家之開心速遞》演員劉丹、呂慧儀、滕麗名、湯盈盈、蘇韻姿、林淑敏、袁文傑等，趁今日（22日）世界地球日於將軍澳電視城進行「來吧，愛護地球！」活動。

早前疫情爆發，令到劇集拍攝受影響，昨晚（21日）播出由劉丹、滕麗名、李偉傑的一集被網民指除了演員少，更靠不少回憶重播片段剪輯成一集，被網民質疑是否劇集沒存貨？滕麗名受訪說：「唔係冇存貨，呢集係疫情最嚴重嘅時候拍攝，劇組為咗大家安全，用最少嘅演員去拍攝呢一集，只係有4個演員，連攝影師都要做埋臨時演員。最少更加試過一集只有3個演員，講全個世界都冇晒人，得我、倪嘉雯、袁文傑，真係辛苦啲編劇去度劇本。（現在是否已經追回進度？）好似拍極都係冇存貨咁，哈哈。」

講到張景淳因遲到問題被暫停拍攝《愛•回家》，最近有傳靠呂慧儀求情能夠重返劇組，但一直指聞樓梯響，呂慧儀說：「梗係有，我成日都叫阿爸（指丹爺）幫口，因為我最接近嘅高層就係丹爺喇。會嘅，我都希望佢快啲返嚟，大家密切期待。」劉丹則指大家也有為景淳幫口，希望他能夠早日「回家」。