蘇皓兒被爆「私有化」！孖得獎導演男友同居築愛巢

短髮女神蘇皓兒近日於無綫劇《金宵大廈2》扮醜飾演毀容女，演技獲得觀眾肯定，近日佢被揭原來早被「私有化」，新歡更係曾獲香港電影金像獎及台灣金馬獎「最佳新導演」嘅電影導演黃進，有導演男友教路，即刻演技大躍進！

日前，蘇皓兒被拍得與黃進結伴，以一身便裝居家Look現身，由紅磡寓所步出，沿路愈行愈近「咬耳仔」，再甜蜜去到餐廳撐枱腳，期間蘇皓兒一臉陶醉，不時嗲聲嗲氣冧男友，又打情罵俏，絕對係熱戀中嘅小情人。而醫飽肚後，佢哋就折返愛巢，沿路仲好熟悉附近環境，快手到咖啡店選購咖啡豆後就孖住上樓，相信已開展同居生活。此外，有指蘇皓兒仲同男友共同收養貓貓「皮皮」，女方不時喺社交網大晒愛貓，而黃進亦養貓多年，有共同興趣難怪成拖友。

不過蘇皓兒（Chloe）接受東網訪問時，就否認與導演黃進拍拖，佢指：「同黃進導演係工作認識既朋友，並非報道所指既戀人同居關係。現階段以工作為主，感情方面仍然空白，將來有新戀情的話會同大家分享。」