Tyson Yoshi尾場有「斬獲」 怨粉絲嗌除褲致甩Beat

2022年08月09日 10:05
東網電視
更多新聞短片
歌手Tyson Yoshi在九展舉行一連4場演唱會,昨晚(8日)尾場請來林家謙擔任嘉賓,Tyson女友Christy則捧足4晚場,尾場更穿上印有男友頭像的大會T-shirt現身。
Tyson與林家謙先後合唱《在空中的這一秒》及《熱到除衫》,期間Tyson不停以家謙的廣告對白:「好熱哩!」去逗對方,但家謙未有理會,反而質問對方:「我睇咗你個Rundown,講嘢嘅位多過唱歌,呢個係咩騷?你回應吓。」Tyson繼續重複問:「好熱哩!」,但家謙就東拉西扯講其他:「點解每晚都有人掟Bra?依家你都要戴啦!」Tyson見對方未有按預期回應,全晚粗口講不停的他連好友也照爆粗鬧:「X你啦!」家謙毫不在意,並大講爛Gag說:「今晚會唔會有Bra你估?我今晚就係你個Bro,Love You Bro!」
一如之前幾晚,當Tyson走近觀眾席獻唱時,有粉絲將Bra及紅色內褲拋上台,認真熱情。當Tyson唱《Something》後,突然自爆忘記拉褲鍊,他即時拉上並笑說:「好閒啫!」最後演唱會以他為女友所作的情歌《Christy》作結,Tyson獻唱時,女友走近台邊輕撫因男友頭髮,閃到盲。
Tyson受訪時感謝張敬軒在音響設置上為他作出調整,令他懂得正確方式唱歌,不用與音響鬥大聲,唱足四場也未有聲沙。講到表現,他自評第二場唱得最好,完全沒有甩漏,反而昨晚獻唱《Bae》時兩度未能入到拍子,他解釋:「因為我之前好投入咁唱緊一首歌,有粉絲大叫除褲,我好忟,用眼神好惡咁凶咗佢一眼示意收聲,入到後台換衫就覺得好內疚點解要咁惡,後來唱《Bae》就滿腦都係諗住呢件事,所以我喺台上即時講出嚟同個粉絲道歉,唔可以屈住喺個心,否則成個騷都會炒。」
問到嘉賓林家謙是否臨時上陣頂替患上新冠肺炎的湯令山?他指一早已安排家謙做嘉賓,只是想不到對方未有依照對白,臨場爆肚將粉絲拋Bra上台作話題,至於為何每晚都有粉絲拋Bra上台,他坦言自己也不知道:「今晚仲癲,有條紅色內褲,我嗰刻都有少少猶豫,但咁多人望住,條褲又咁鮮色,惟有用最有型嘅方法拎起佢。」
另外,由於MIRROR紅館騷事故,以至Tyson個唱要取消飛天環節,他表示舞台設計上有不少改動:「2022年仲邊有人用腳由主舞台行去小舞台㗎,原本係有升降台,我會吊威吔飛番去主舞台,再吊喺空中唱一首歌。(會唔會覺得失望?)話冇失望就假,但冇計,已經訓練到我有得開騷就好開心,湯令山中咗Covid唔緊要,我冇中,我唱到就OK。因為成個騷係自己掟錢,今次搞唔成我真係破產,公司啲錢清空晒去做騷,依家係有錢賺,但唔係賺好多。(投資再大型嘅騷?)唔好迫我諗住,畀我做一星期廢物先,乜都食吓,我戒咗口好耐。」提到他以《Christy》作個唱結尾,問是否有特別意思?他否認:「只係搵一首最多人認識嘅歌去完場,唔係女友指定。(佢係你老細喎!)你都可以咁講。(今晚輪到女友摸你頭髮?)係佢臨場發揮。」他又指其個唱有兩個傳統,一是不安歌,二是以《Christy》作完結。