歐陽娜娜P圖失手　身後櫃門走入失控多重宇宙

台灣女星歐陽娜娜密密返內地搵真銀，最近終於都有時間放下工作，返家鄉同屋企人拜年，尤其見到自己父母同姐妹，仲專登同老竇着父女裝，幾咁溫馨！難得放假唔使做，佢仲走去染咗個金髮賀新春，又成日周圍行街濕平，今次佢就一身戰鬥格「微服出巡」，見佢以短裙黑絲襯貼身上衣咁去到舖頭睇嘢食，仲擺晒S形甫士叫人幫佢影相，一時側起頭仔望鏡頭，一時就扮專心揀嘢食。

不過網友嘅Focus就唔喺佢對美腿上，即使有性感黑絲搶收視，但反而佢腳仔後面嘅櫃門全部都「失晒控」，扭曲變形到好似走咗入「多重宇宙」咁，仲要一連3張靚相都係咁，令人不得不留意住「異空間」嘅離奇現象，難怪佢P圖失手反而成網友熱討焦點，睇嚟佢嘅P圖技術有待改進。