金像獎︱王菀之爆冷奪最佳女配角

《第41屆香港電影金像獎》今晚（16日）舉行，今年「最佳女配角」一獎，競爭都算相當激烈，最終由電影《飯戲攻心》的王菀之，撼低林明禎、余香凝、區嘉雯等奪得，2015年曾奪得過該獎項的她，今次是第二度獲獎，王菀之一上台即大嗌一聲，並笑言：「多謝大家，同埋《飯戲攻心》整個Family，亦好多謝導演畀我加入呢個家庭。」王菀之笑指自己有時都會問自己是歌手定演員，很感謝大家畀機會她，令她可以接近夢想，當然也要多謝屋企人以及支持她的歌迷，亦希望若果她有影迷的話，都可以支持她拍戲。

當得知獲獎時，王菀之大叫了出來，她受訪時表示：「今晚有兩個提名，一個係歌曲一個係女配，我之前同同事講女配唔需要諗，因為對手好強，加上係喜劇難啲，知道得獎我個腦空白一片同埋震晒，通常我攞獎係好冷靜，今次出晒汗，又怕多謝漏咗人，心情好複雜，好想攬住個團隊。（會否加片酬？）睇吓乜電影，比起初出道我係有唔同咗，但如果係支持新導演我係唔會咁計，要睇意義。下個目標係影后？都可以向呢個目標努力吓，無論咩崗位都可以，因為唔一定會遇到好團隊。」