苗僑偉練拳虎虎生風佬味濃　盡騷強壯臂彎引死人

藝人苗僑偉同老婆戚美珍育有一對子女，而隨着仔女大晒有屬於自己嘅世界之後，苗僑偉同老婆戚美珍嘅2人世界亦過得相當精彩。向來喺圈中型佬代表之一嘅苗僑偉，多年嚟保養有道，Fit到漏嘅好身材亦被唔少粉絲大讚「愈老愈有型」，最近喺香港拍完劇就即刻飛加拿大同仔女團聚嘅佢，亦不忘繼續搵教練操身材外，教練更大有來頭，竟然係健身及拳擊教練MMA選手許博焱，而許博焱亦大讚苗僑偉狀態大勇：「今天第一練。拳法、力量很好！」

苗僑偉雖年屆花甲之年，不過片中嘅佢仍拳拳有力，耍得虎虎生風外，舉起啞鈴時所露出嘅強壯臂彎，更係令人睇到眼定定。事實上，近年苗僑偉除向MMA拳擊教練拜師學武外，就連歐式泰拳、划艇機及單車機等都有接觸，體能認真驚人。