你好，我的大夫︱許俊豪力追蔡思貝　自薦加浪漫戲份

視后蔡思貝於無綫劇集《你好，我的大夫》結局篇中，與何廣沛的感情發展似乎已告一段落，劇中飾演Hunter的許俊豪（Lincoln飾）正式發功直接示愛，並自揭暗戀她14年的真相。昨晚一集中二人相當浪漫，包括遊電單車河、海邊談心及沙灘戲水等，之後Lincoln更會行動升級，自彈自唱情歌氹思貝入眠，據知該幕浪漫戲碼更是由Lincoln向監製自薦，他受訪時謂：「收到劇本後我有同監製方駿釗商量到底，有咩浪漫嘅事會令對方感動，我話自己都學過結他同鋼琴，最後我哋就揀咗自彈自唱氹思貝瞓覺呢一幕。首歌係監製揀嘅，我就要花啲時間去練前奏，因為始終都揼低咗一段時間。」

Lincoln又指與思貝在互動場口上花了不少心思，以加強角色說服力，包括刻意保持距離：「例如電單車戲或者沙灘談心戲，大家都可以留意到我哋嘅肢體語言係點到即止，都係我捉吓佢手踭或者佢搭吓我膊頭，主要想表達角色嘅戀人未滿關係，同埋我對佢嗰種純純嘅愛。」