東網電視
更多新聞短片
.
內地頂流小花白鹿早前因拍攝大熱新劇《寧安如夢》，被傳同男主角張凌赫假戲真做，曾被拍得自由進出男方屋企，離開時仲要facetime對講比愛心，即被指係熱戀中，但今年11月該劇上檔時，就傳出兩人已分手，尋日（27日）有內地媒體點名稱白鹿老闆、內地最強製片人于正「棒打鴛鴦」，于正搞到忍不住要出聲。
白鹿同張凌赫被傳假戲真做。
網上指佢哋分手係公司捧打鴛鴦，怕影響白鹿星途。
更點名係白鹿老闆于正出手。
爆料指白鹿同張凌赫係于正點名嗌白鹿分手，因為白鹿後面存有好多劇集未播，佢哋如果再被拍、再被斷正會「掉粉」，白鹿同張凌赫呢對CP唔拆，會影響白鹿後面好多新劇嘅宣傳，所以有傳二人被公司指定要分手。有粉絲即去于正社交網留言質問，搞到于正嬲爆爆回應：「甚麼跟甚麼，莫名其妙。狗仔沒流量了，還是我太紅了？」仲衝上熱搜第一位，全城關注。
爆料媒體繼續緊住于正唔放，追問：「于正老師別臭美啦，咋（怎麼）不正面回應分沒分手啊？該不會他倆又和好了吧？」不過有粉絲認為佢口講無憑，嗌佢搵到二人拍拖證據同埋親密私照先再傳佢兩個嘅緋聞。
于正寸爆料者博出位，不過佢都係冇正面回應真偽。
