張寶兒自爆產後生紅疹　囝囝冇人奶飲擔心到想喊

藝人張寶兒去年年底誕下同袁偉豪嘅愛情結晶品「袁咕碌」，並不時透過社交網同粉絲分享生活點滴及育嬰心得嘅佢，繼早前分享喺內地坐月嘅心得後，日前更透露原來自己坐月期間竟然因抗生素敏感生紅疹外，仲因為囝囝冇得飲人奶擔心到想喊，認真慘慘豬。

另外，身為新手爸媽嘅張寶兒及袁偉豪，亦分享道第一胎會揀開刀生產嘅原因之一：「因為我爸爸話開刀生BB個頭會圓啲，可以保護BB。」之餘，張寶兒亦坦言最重要係因為坐月期間袁偉豪喺深圳拍劇，剖腹產子更同時方便老公預早向劇組請假，陪佢生產。同時，張寶兒大讚囝囝未出世就已經好錫媽咪，因為懷孕期間唔辛苦外，生產過程順利得嚟又快唔痛，最重要係產後去廁所都冇任何困難不適。最後，張寶兒亦不忘激讚囝囝袁咕碌聽話肯飲奶嘅同時，張寶兒亦透露自己奶量大，現時更可以餵全母乳。