關寶慧拍戲遇怪事　梁思浩揭已故女歌手曾報夢告別

藝人關寶慧近日擔任無綫節目《直播靈接觸》嘉賓，天生陰陽眼的她經常拍攝鬼片及靈異節目，「見鬼」的次數可謂無日無之。現場即自爆「撞嘢」經歷：「幾年前拍戲時準備咗一對連戲拖鞋，點知其中一隻着唔落，但對拖鞋係私伙嘅，後來睇番其中一隻明顯細咗一個碼！」後來才得知原來有一隻女鬼寄存在鞋內。寶慧又指不少已過世的好友都會「回來」探望她或報夢，當中包括形象指導張學潤（Nel Nel）︰「佢有搵過，但係Get唔到佢嘅暗示係乜嘢，問極都唔知。」她透露自己會繼續修行，希望有朝一日可以知道故友們的要求。

至於主持梁思浩談到已故好友歌手黎明詩（Stephanie），「佢28號走，26號嚟搵我，夢中同我講拜拜話『我走喇』，醒咗之後打畀佢屋企人講返，佢哋都唔信，跟住隔咗兩日真係走咗。」他又提到早前為已故小朋友做法事，儀式期間他默念「小朋友有咩想交代」，忽然有把小朋友聲回應說「佢哋好衰爭我桶炸雞」，「我即時問佢父母，佢媽咪聽到淚流滿面，原來之前佢答應咗小朋友生日會買炸雞，但最後冇買到，小朋友因此跳樓自殺！」