楊丞琳李榮浩夫妻冇情講　杭州同日開騷鬥搶客

台灣歌手楊丞琳2019年同內地歌手李榮浩結婚，夫妻2人更不時透過社交網隔空放閃，而上月楊丞琳迎來40歲生日時，老公李榮浩準時喺社交網晒出楊丞琳童顏有鬚相，並獻上生日祝福；而喺日前（11日）李榮浩迎來39歲生日時，楊丞琳亦準時晒出同款李榮浩嘅童顏有鬚相為老公慶生，連續10年嘅日生祝福認真閃盲一眾網友。

雖然夫妻2人恩愛有加，引嚟雙方粉絲祝福及羨慕外，有眼尖粉絲發現楊丞琳及李榮浩各自巡演嘅杭州站，竟然都係9月21日舉行，意外嘅撞期令粉絲忍唔住難過道：「不能一起辦一場嗎？」甚至有粉絲許願2人可以合併開一場6個鐘嘅演唱會。