斷正與龍婷車廂激咀　已婚丘亞葵唔認撻着：只係Hello Kiss！

現年43歲的龍婷參加《中年好聲音》雖然三甲不入，但唱功出色的她仍簽約無綫成為歌手，全力發展歌唱事業。龍婷專注唱歌工作，對於私生活一直保持低調作風，但有傳龍婷與資深演唱會製作人、現年65歲的丘亞葵約會，更被影到在車廂內激吻。

有指龍婷日前完成工作後，即急急去會合丘亞葵約會，當日丘亞葵親自架車在龍婷出席活動的場地附近等候她，兩人先到了九龍灣一家商場，龍婷走到一家車仔麵店搵位，丘亞葵則到戲院買定電影《九龍城寨之圍城》戲飛。之後兩人一起用餐，在角落位置撐枱腳，兩人有說有笑，期間有粉絲認出龍婷要求合照，丘亞葵亦會耐心等待。他們睇完戲後，又去了食米線，龍婷望住丘亞葵的眼神甜絲絲。

兩人食完米線，便到停車場取車，龍婷還翹住丘亞葵的手臂。而當走到僻靜無人之處，龍婷更把手放到丘亞葵的屁股上，並輕輕拍打了幾下，男方則顯得相當受落。二人在車廂內情到濃時，龍婷甚至主動將身軀挨向丘亞葵，輕搭對方膊頭，把嘴伸向丘亞葵，然後兩人便親吻了起來。龍婷曾在訪問中表示擇偶條件是喜歡成熟型，年紀大些經驗和能力都會強些，相信丘亞葵便是她的理想人選。

據知，丘亞葵已結了婚，老婆是前無綫製作統籌，有一名女兒在日本留學。早前亦與老婆一起出席聚會，至於現時的婚姻狀況的確耐人尋味。

丘亞葵接受東網獨家訪問時表示，和龍婷早在2017年經唱片界朋友介紹下而認識：「嗰時佢想搵經理人，但我太忙冇合作到，直至去年喺公開場合再見番，大家都話希望嚟緊可以合作開騷，而今年頭，我同佢傾真係可以合作，不過傾場地問題時，又覺得個場太細，所以取消咗，依然仲傾梗一個較大啲嘅場地。」

至於被拍到和龍婷睇戲及晚膳，期間女方拍他pat pat及在車廂激嘴，他澄清：「我係已婚嘅人，同龍婷清清白白，見面只係為工作，其實啲相係兩個月前嘅事，嗰日我哋約咗傾演唱會，因為都夜晚啦，我有啲肚餓，咪叫佢一齊落公司樓下食小小嘢，同埋齣戲咁hit，買飛入場支持吓業界，（有親密舉動喎？）拍Pat係角度啫，我都感覺唔到佢拍我，講到激嘴仲誇張，只係朋友式嘅Hello Kiss，錫咗一啖面，唔係大家諗到咁，我同老婆結咗婚好耐，亦已經同老婆解釋清楚，我都唔係咁嘅人。」

問到可會和龍婷斷絕來往，他說：「都係同以前一樣啦，只限於工作上見，其他時間就唔見私下見面。」他又謂就事件向太太及龍婷等致歉：「唔好意思，影響咗佢哋！」

龍婷接受訪問時表示，要與公司商量才作回應：「我依家等緊公司覆先可以講畀記者聽，依家仲未確實，公司仲未答我。」她又說：「我有自己諗法，同佢哋（公司）溝通咗，睇吓佢哋點樣覆。」她稱稍後應有統一回覆。

隨後無綫發聲明表示兩人僅是朋友關係，「針對近日的媒體報導，我們希望澄清，所提及的情況完全是由於拍攝角度所致的誤解。龍婷女士與丘先生僅為多年好友，兩人之間純屬友誼。龍婷女士將持續專注於她的音樂事業發展，繼續為大家帶來更優質音樂演出。我們誠摯希望媒體及公眾能基於事實作出理解，避免不必要的誤會。」