愷樂自爆已生仔推翻「待孕生B女」　怒轟：你賣友求榮！

台灣舞王羅志祥2020年被當時女友周揚青爆同愷樂（蝴蝶姐姐）搞不倫戀，愷樂公開道歉後即消失幕前4年，直到前日（2日）佢終於「上水」，透過社交平台分享胎兒超聲波照，親證有喜。對於網上傳聞指小孩爸爸係上海醫生老公，又被爆料肚中胎兒性別係B女，並稱將喺下個月出世等消息，愷樂罕見動怒，更爆Seed打臉爆料者「賣友求榮」，但未指名道姓。

愷樂見咁多粉絲期待佢復出，直言：「謝謝你們，好感動。」同時附上愛心，但面對連日爆料者嘅捕風捉影，愷樂都決定唔再忍，發文寫下：「現在和前友人已許久未曾有任何聯繋，不知為何要一直爆料捏造假消息？也許想以此來，維繋與媒體間的交情，但需要用不實的內容來換取？賣友求榮和熱愛扮演受害者博關注同情的習慣要改一改，不然大概率會，對號入座跳出來大炒一波新聞求熱度。但很抱歉現階段的我照顧寶寶，連覺都沒時間睡，不會配合你，我先去照顧兒子了。」自爆自己係生B仔，BB更已經出世，一次過推翻不實爆料。