東網電視
更多新聞短片
視頻觀看次數: 11.4k

叱咤「女金」李幸倪(Gin Lee)率同門歌手鄧小巧、曾傲棐及女團VIVA拜年,祝願歌迷萬事如意,旺氣十足!去年大豐收的Gin Lee接連傳喜訊,預告年底再開個唱,每場唱足3粒鐘報答歌迷!至於VIVA已搬離「風水屋」,望與緊接的租客「有運齊齊行」,夠晒大愛。
Gin Lee近年行運行到腳趾尾,簽約英皇後首奪「叱咤樂壇女歌手」金獎,又將推出新專輯,她還預告相隔7年將於年底舉行演唱會,屆時與一眾Fans玩餐飽,並打開心扉分享心底話,讓大家對「李幸倪」知多一點點。談到演唱會主題,她說:「想放多啲元素入去,我覺得欣賞演唱會同睇電影一樣,入嚟3個鐘隨着起承轉合,令觀眾有唔同感受。(依家心態上最大嘅轉變係咩?)成個人定咗好多,坦白講以前比較徬徨,好彩遇到好嘅團隊,大家有共同目標一齊奮鬥。(想喺啟德開騷?)都想,但要睇攞唔攞到期。」
請家人外遊叉電
她再三感恩工作人員去年為自己出盡全力,故奪「女金」後第一時間自掏腰包宴請大家打邊爐慶功:「新年梗係會封大利是答謝大家啦!」去年「年終無休」的她早已申請假期,新年請家人到熱帶地方旅行,由訂機票到計劃行程均一手包辦:「今次會親親大自然,我安排大家每日只去一個景點,有時間再諗其他嘢。成年冇放過假喇!要好好放鬆兼放空!」

李幸倪率領VIVA、鄧小巧與曾傲棐拜年!

一齊為蛇年開個靚頭!

Gin Lee近年行運行到腳趾尾!

李幸倪預告在年底舉行的演唱會上,與歌迷分享內心世界。
至於VIVA入住張敬軒的「風水屋」月餘即沾染旺氣,先後在兩個頒獎禮上勇獲組合金獎,然而4女已結束同居生涯,「風水屋」亦已歸還軒仔,再讓其他人租住,「分甘同味」將好運傳承下去。談到「分居」,她們異口同聲笑說:「入住時每日都好忙,冇舉行過入伙儀式,亦冇乜時間好好欣賞間屋,估唔到搬走時,大家都趕住執行李,可以話冇Farewell呀!不過呢段時間住得好開心,冇拗撬之餘,感情仲好咗。」

張敬軒近年人氣強勁!

VIVA早前入住張敬軒的「風水屋」月餘即沾染旺氣。

VIVA「同居」期間感情大增,覺得是很好的經歷。
曾傲棐自認「招財」
曾傲棐同樣獲頒新人獎,他笑說:「壞嘅嘢留喺舊年,好嘅嘢今年繼續。我會作多啲新嘗試,包括幕後創作工作。我由細到大都好鍾意引人笑,如果有導演有呢類角色,不妨聯絡小弟畀個機會,哈哈!」他又自爆是「運財童子」:「中學試過跟同學擺年宵,賺咗6、7萬㗎!我哋將啲錢捐晒畀慈善機構。」聽到Gin Lee與鄧小巧等「心心眼」,紛紛起哄:「咁你再去競投攤檔,預埋我哋一齊發新年財!」
而結婚數年的小巧性格愛靜,過往通常選擇避年,但今年硬着頭皮出席家庭聚會,正式介紹外籍丈夫給親友。談到工作,她笑說:「乜都撈呀!棟篤笑、舞台劇甚至旅遊節目,歡迎任何挑戰。」

曾傲棐自認「招財」!

鄧小巧今年硬着頭皮出席家庭聚會,正式介紹外籍丈夫給親友。
Gin Lee:
Hair:Heibie Mok@heibiebie @artify.lab
鄧小巧:
Hair:Don Don @ Indulgence Salon
曾傲棐:
Hair:@myos_karol
VIVA:
Hair:Ritz Lam、Jeremy Wong、Kelvin Liu、Taka Chung、Hiro Chow @myos_hair
Venue:Studio Meta