娛圈單打︱入咗雪櫃變雪條 姊妹搶位唔畀面

新聞觀看次數:31.9k
香港時間
01月31日(五) 00:01
東網電視
更多新聞短片
踏入蛇年,娛樂圈一眾小花當然唔可以蛇王,而係要學似蛇一樣靈活走位啦。好似「聲夢小天后」炎明熹(Gigi),同TVB份約傾極都傾唔埋欄,長期被掟入雪櫃,其空出嘅位置,自然有其他小花攝位。當中最得寵嘅,莫過於「國民初戀」姚焯菲(Chantel)!
TVB簡直錫到佢燶,除咗搵Chantel主唱《愛.回家》主題曲外,更安排她秘密加入劇組,日前網上已流出其開工照,會同熊家有對手戲。大家都知,《愛.回家》一直收視高企,好多人開到聲恨拍都係得個吉。大好機會,Chantel唾手可得,點會唔係得天獨厚吖?
咁仲唔止,TVB最近更安排Chantel登上《聲生不息.大灣區季》舞台,同容祖兒、薛凱琪及衛蘭合唱《女神》毫不怯場,表現令人眼前一亮,獲內地觀眾大讚為「新生代寶藏歌手」。
想當年《聲生不息》第一季,Gigi一樣獲TVB安排參與,結果幫助Gigi知名度十級跳,成為佢返內地搵真銀嘅契機。家陣同一條捧人Formula放喺Chantel身上一樣掂,證明TVB有意打造Chantel成為新一代小天后,取替Gigi位置。
行船爭解纜,同行如敵國,就算兩位小花本身幾老友都好,講到上位一樣冇面畀。娛樂圈競爭激烈,Gigi同Chantel唔止同樣係《聲夢傳奇》出身,年紀亦係差不多,重疊性非常高,亦即係隨時可以被另一人取替。冇計啦,Gigi扭計唔肯簽約,Chantel則聽教聽話,大台咁識計數,梗係全力捧個乖乖女啦。
Gigi(左)慘成「雪人」,Chantel坐收漁翁之利。
好嘢
23
唔錯
35
撐呀
159
感謝您瀏覽東網。請按入詳細閱讀本網站所載之使用條款及細則私隱政策聲明,並須確定您同意接受有關條款及聲明的約束才可繼續瀏覽。