東網電視
更多新聞短片
電影市道低迷，戲院生意淡薄，去年先後有9間戲院宣布結業或停業。嘉禾院線今日（12日）公布，將於2月15日起旗下7間戲院將推出新票價，普通2D電影票價成人飛降至40蚊、小童及學生30蚊、長者低至20蚊；IMAX電影票價，成人、小童及學生低至65蚊，長者50蚊就有得睇。嘉禾稱今次票價更改是長期進行，直至另行通知。
嘉禾院線推$65睇IMAX等至抵票價。
今個春節多套賀歲片搶攻。
嘉禾表示，推出「至抵」票價希望等一眾長者「重回那些年的觀影感覺」外，亦想回饋戲迷多年嚟對香港電影及戲院嘅支持。此外，嘉禾亦會繼續維持「星期三$40票價」及「網上購票手續費全免」。但要留意，嘉禾旗下7間戲院於周末（星期六、日）期間，票價會較平日高；周一、二及周四、五，各戲院票價會有差別，周三則全線2D電影統一票價40蚊。
香港電影工作者總會發言人田啟文早前表示，雖然港產片有些微復甦迹象，但戲院營運開支高企，不足以令戲院支撐下去。佢舉例旺角商場戲院早前結業後，承接嘅新戲院租金由「天價減半」，顯示戲院並非「無得做」，而係點樣做及空間如何。
望減價可谷市民入戲院欲望。
對於有院線以低價谷票房，多位藝人就此回應東網：
張繼聰：「呢個都係一個好方法去吸引觀眾入場，喺依家咁有挑戰性嘅時期，真係要諗啲方法去維持生意；我哋影業就要繼續拍多啲好嘅戲，以新題材吸引觀眾，做好自己，希望畀到觀眾信心去入場，香港觀眾其實都好支持影業，我哋要繼續努力；當然都希望政府能夠畀多啲支持，依家真係一個艱難嘅時刻，當然資金資助係最直接，始終依家投資拍戲係高風險相對比較低回報嘅投資，老闆開戲都好困難，希望政府有多啲資助。」
陳靜：「非常支持，希望大家齊心共渡電影業嘅寒冬，同埋觀眾可以多啲入場支持，每一張戲飛都係一個支持，希望政府可以效法其他亞洲地區咁支持娛樂產業，其實亦都可以帶動到旅遊發展，我覺得係可以做到雙贏嘅效果。」
伍允龍：「近年市場都唔景氣，各行各業都要諗辦法自救，今次出呢個優惠價畀市民可以睇到高質素嘅電影當然係好事，吸引返市民出街，留港消費等等。其實知道近年業內嘅電影工作者都有減薪去拍戲，互相扶持。當然希望政府繼續撥款資助，大家亦拍到多元化嘅電影，拍多啲觀眾喜歡嘅電影，令佢哋走入戲院親身支持。但為咗電影業好，主要都要靠業內嘅大家一齊去多動腦筋，製作出好質素同好嘅電影，好似《九龍城寨之圍城》咁，可以去到世界各地唔同嘅地方，都令到觀眾自己行入戲院，從而交流更多。」
鄧月平：「平價戲票可以吸引一批觀眾入場，覺得係好事，我第一次入戲院睇戲，喺學生時期當時無乜錢，見到有優惠就入去戲院睇戲，但除咗以平價戲票去吸引觀眾之外，我覺得好劇本、好嘅拍攝都好重要，同埋好想多啲地方可以推廣電影，好多時我搭飛機都會諗，香港機場係咪可以設一啲觀影院，等嚟自世界各地嘅人都可以睇到香港電影，又或者喺機場搞一啲電影展覽，令一啲寫咗劇本嘅人可以放啲故事大綱同大家分享，希望可以吸引到投資者。」
張繼聰最希望有資金資助電影業。
陳靜指每一張戲飛都係一個支持。
伍允龍繼續落力製作出好質素嘅電影。
鄧月平建議香港機場可以增設觀影院。
