東網電視
更多新聞短片
天后容祖兒連續3年在澳門舉行《Eternity演唱會》，票價由$688至$2988。而今年的場次將會由4月12日起展開，直至5月18日尾場。多間旅行社就推出不同形式的旅行團，一個價錢可以2日1夜包食住、睇容祖兒演唱會，再玩埋澳門及珠海。
多間旅行社推出2日1夜的容祖兒睇騷團，日間時段會去食特色棟企雞宴、自由暢玩各大娛樂城、食海鮮肥牛韓燒、遊覽百年嶺南古村唐家灣古鎮等，晚上睇《Eternity演唱會》及自行安排晚餐。行程包一張$688的演唱會飛，亦即最平價位，但2日1夜團費只需$1,099，聽落相當相宜！不過宣傳單張亦講明門票不能轉讓，入場時會核對證件。
其他旅行社都有類似的旅行團，中間會玩的景點皆有分別，例如會食荔枝柴燒鵝、睇紅博城古建築群、參觀中山咀香園文化園等。雖然未必全部有報價，不過記者就發現，其中一個聲稱$999團費的兩日一夜珠海澳門團，竟然包容祖兒$988演唱會飛及3餐1宿，抵到難以置信！
另外較大型的旅行社都有推出三天團，除了主打包$988的《Eternity演唱會》門票外，亦會標明入住去年開業的全新酒店、於空中餐廳食酒店自助晚餐，玩埋順德及珠海等地，雖然冇寫明價錢，但網上套票價，發現酒店要另付附加費，3日2夜加埋都要$3,554，不及其他團般價格親民。網民就大讚這些團好抵玩，也有人說：「一人之力拯救死寂旅遊業！」
祖兒連續3年澳門開騷。
好有心！
有旅行團以超抵價包你食玩瞓睇！
